l’autore del contributo
di GIANNETTO LAPIA
Sa ‘idda nostra, no est meda manna, però bi tenimus tottu sas cosa printzipales chi bi sune in d’onzi ‘idda de rispettu: Su sindigu, su vicariu, su marisallu e su duttore, bennidu de ‘innedda.
Comente d’onzi ‘idda, bi tenimus fintzas su “printzipale”, su benestante, sa pessone prus ricca, possidente e potente.
Custu est tziu Antoni Bragheri, menzus connottu comente “tziu Antoni Braghetta”.
Su paralumen, li vit istadu postu de sa tzente e l’acchirrait che istrale! A narrer suo e de sa tzente, non b’aiat femmina in bidda chi non fit colada i manos suas o menzus, in su lettu suo. De cussu, su proerju de “ tziu Antoni Braghetta”.
Novant’annos supra sas ancas (frimas) e sa conca chi pariat galu sana. Isse teniat e cumandavat terras, bestiamen, teraccos e dinare!!! Teniat tottu: benes e salude.
Non li mancait mancu ne sa barrosia, sicuru de su chi fit, ne su risittu in cara cando bi coalait carchi zovana in carrera: “Cussa mi l’happo fatta prus de una ‘orta”!!!! fit solitu narrer! E si fit appenas appressadu, non mancait de che azungher carchi particulare chi rendiat prus curiosu e “piccante” su sou contare.
Non cumbeniat mancu a lu contrariare ca teniat fintzas sa limba mala e longa che ispidu. Beru o faula, su chi naravat iesse (bene cundiu) faghiat leze!
Sanu che pische, eppuru d’onzi mese andait a su duttore pro si faghes visitare e fintzas inie si vantavat de comente istavat bene e de cantu fit sanu chin sos suo noranta’annos!!!
Una die in su duttore.
Salude tziu Antò! … e tando comente sezis oje?
Dottò, ja’isto vene! Pro torrare gratzias a Deus, m’intendo veramente bene!!!
Happo intesu chi azes buscadu una teracca nova e non tenides s’ocru puntu, na chi est una zovanedda rumena de una vintina de annos, ma est belledda veramente!!! Sezis Bragheri a jà bragades veramente como chin sas zovaneddas de prima essida!!!
So cuntentu veramente, la tenzo giai tres o battor meses, ma est veramente una bona massaia! E tantu pro non perder su paralumene, la tenzo prinza!!! Hah ahh ahaha!!!!
Su duttore est istadu carchi sigundu penzamentosu: tziu Antoni, norant’annos, sa zovanedda rumena de vint’annos, imprinzada de tziu Braghetta????
Tziu Antò, bos cherzo contare unu contu. In bidda mea, bi fit un’omine, cazziatore. Nessune fit tifosu de sa cazza coment’isse. D’onzi die, o a manzanu o a sera, busile a coddu, isse deviat essire a su buscu a cazziare.
Una die, chin sa presse, essit a cazza chin busile a tracolla, ma si ch’irmenticat sa cartuzzera in domo! Tantu fit forte su disizzu de andare a cazza chi sa conca haiat pensadu solu a picare su fusile, ma de cartuzzas nudda!
Zirande in su buscu, li essit unu betze sirbone chi si li parat indannantis chentza niuna timoria.
Su cazzatore imbratza su busile, lu puntat e …. click click! Solu su sonu de sos canes.
S’omine aperit su busile e s’abizzat chi fit boidu: non b’aiat ne cartuzzas in canna ne in cartuzzera. Solu como si vit resu contu de non tenner muniziones.!!!
Corazzosu innanti ‘e su sirbone, torrat a piccare animu, serra su busile, puntat sirbone e chin sa ‘ucca li boghinat a sirbone, Pam! Pam!!!
Beh, tziu Antò, non b’azes a creere, ma sirbone est ruttu a unu muntone, mortu!!!
Ha ha ha ah! Riet tziu Antoni, No est possibile! Non b’andat bene! Non bi credo mancu si lu ido!!! Incue at tiradu calincunu atteru! Solu un’atteru potet aer tiradu!!!! Ello, no est possibile!!!!
Su duttore, pigande in manos de nou s’arrejonu, si zirat cara a tziu Antoni:
“Tziu Antò, torrande capu a su chi mi azes contau, s’imprinzu de sa teracca bostra, est sa matessi cosa de s’istoria de custu cazziatore e sirbone: incue, bat tiradu atteru!!!
