S'ARBURE DE NADALE


di Anna Maria Sechi

Annu 1947, istaimis in Macumere,  in su corso afacca a su mercadu b’aiat una butega inue bendiat de totu,  alimentare e atretzareddos, custa butega teniat una vetrina in facia a su corso, m’ammento chi pro sa festa de Nadale in custa vitrina b’aiat una arbure fronida de fiocos colorados,  inue fint apicados mandarinos, mustatzolos, caramellas e cicullates e castantza sicca infilada a tipu ghirlandas, custu est  istadu su primu arbure de Nadale chi apo idu deo.Passaiat oras  incantada in dainanti ae custa vitrina abaidende totus cussas cosa bonas chi bi fint in s’arbure  fatu dae una nae de laru, ae cussos tempos su pinu costaiat tropu e no fit de usu. A pes de cust’arbure de Nadale bi fint sos giocatolos fatos in linna sas puddas chi bicculaiant, sas domitas, sos cadditos de cartone e bi fint puru sas bambolas, una prus bella de s’atera, teniat set’annos e su disitzu meu fit propriu de aere una bambola. Onzi note prima de mi che drommire pregaio su Gesù bambinu chi mi ateret una bambola a pasca de Nadale e ontzi mantzanu torrariat a sa vitrina de sa butega pro mi godere sas bambolas chi bi fint in mustra. Ae cussos tempos pero’ sa posta de Gesù bambinu no funtzionaiat comente oe,  cun totu sas oraziones mias, no apo tentu mai sa fortuna de retzire una pupia. Su primu arbure de nadale chi amus tentu in domo est istadu in s’annu 55, istaimis in sa bidda de La Louvière, babbu triballiaiat in miniera, su turnu sou fit dae sa duas a sas deghe de sero, mama m’at dadu carchi francu pro comporare unu pinu e carchi boccitas de idru coloradas e-i sas candelitas de chera pro iluminare, aimis invitadu una familia sarda pro passare un’ora paris. Fit unu ierru meda frittu, aiat niadu meda e foras fit totu geladu, cando babbu a sas udighi de sero est torradu dae sa tzoronada sua, totus umpare amus chenadu cun semplitzidade pane e casu e salame, deo aiat preparadu un’impastu de frijolas  e mi so posta a las friere, deo friende-las e issos mandighende-las  amus afestadu sa note de Nadale  godenden-nos cun allegria. cussu primu arbure de nadale cun sas candelitas de chera allutas  nos at postu in festa totus, ancora l’ammento.

Lascia un commento

Il tuo indirizzo email non sarà pubblicato. I campi obbligatori sono contrassegnati *