TONINO ERRE: RINASCHIDA E EMIGRATZIONE, TRABALLU E LOTAS SINDACALES: UNA VIDA PRO SOS DERETOS DE SOS TRABALLADORES, PRO S’AMBIENTE, PRO S’AGHERA E S’ABA SANAS, PULIAS E CHENE SONOS

di TONINO BUSSU

Oje in sa trasmissione de limba biba, in Radio Nugoro Tzentrale, intervistamus a Tonino Erre, un operaiu chi oramai si podet godire cun trancuillidade sa  pensione in Lombardia, a pustis de annos de triballu e de emigratzione, chene irmentigare mai sa Terra sua , sas raighinas sardas suas. Tonino difatis est partiu zovaneddu, in su 1965, dae Ollolai, in su tempus de sa Rinaschida in Sardigna, sa casione chi sa Regione e s’Istadu depiant galantire postos de traballu pro totus. Tando s’islogan fiat: “Nella Rinascita c’è un posto anche per te!” iscritu in sos manifestos distribuidos in totu sa Sardigna. Inbetzes est aumentada s’emigratzione car’a sas tzitades  nodias de su Triangulu Industriale de su Nord Italia: Genova, Torino e Milano. A ibe arribaiant dae cada parte de s’Italia medas emigraos in chirca de triballu e deretu agataiant ocupatzione in sas industrias tessiles de cussas tzitades mannas o de sas tzitades de a furriu.

Ma su 1965, s’annu in su cale est partiu Tonino Erre, fiat puru su ‘e sa marcia de protesta de su sindicu de Ollolai Micheli Columbu, chi aiat marcau chi in sa bidda sua bi fiant, in barba al Piano di Rinascita, “50 capos familia disocupados dae conca a pedes”.                                                                          

E Tonino Erre est unu esempiu classicu de emigratzione, ca su babbu non fiat propiu disocupadu, ma non teniat mancu unu triballu fissu, sicuru cada die. E pru cussu su zovuneddu, chi teniat pacu prus de 17 annos, partit a sa sola in Lombardia in provincia de Varese, a Solbiate in ue comintzat a triballare deretu in unu cotonificiu, su triballu l’agatat in presse, in ie non bi fiat problemas, antzis arribabat binas ateras familias dae ateras regiones de s’Italia meridionale, de su sud e deretu buscabat su triballu in su cotonifiu e totu.

“Su fatu de tennere unu puntu de apogiu est istada una cosa manna, antzis m’at incorazau a moere su prus sa notissia chi una sorrestra m’aiat dadu: Si ti che benis como in continente podes assistere a un’eventu particolare: depet bennere a Milano su complesso inglesu prus famadu, sos Beatles, gai andamus a los biere paris. E deo puru cun custa idea e disizu de podere ascurtare sos Beatles apo comintzau s’avventura mea de s’emigratzione chi durat galu como.”- contat Tonino Erre.

Duncas s’est istabiliu prima in Solbiate, in provincia de Varese e, a pustis cojubau in Marnate semper serente a Busto Arsizio. In su 1968  at fatu su militare tra Chieti, Napoli e a pustis in sa Caserma de Modena e tando est torrau in Lombardia  a triballare in su cotonificiu. De su famosu ‘68, s’annu de sa contestatzione m’ammentat solu chi at depiu ‘ubbidire’, chi  non bi fiat democratzia; ma, narat chi fiat  zai abituau dae su seminariu in ue su pride don Delogu lis ripitiat: “Inoghe non esistit sa democrazia, inoghe bisonzu solu de ponnere in mente”.

E in sa fabrica si faghiant sos turnos de oto oras, su manzanu o su sero. Triballabant su filu de cotone in iscuadras de zovanotos de sete o oto pessones. Tando irmontabant sos machinarios e los ingrassabant e los torrabant a montare, totu cosas chi ant imparau inibe cun sa pratica, chene cursu perunu. 

Tando  in su settanta  si ch’est  intrau in sa  Montedison in ube su triballu l’at dau prus soddisfatzione, insumma.

Sa Montedison fiat in Castellantza,  su triballu s’agatabat deretu, a pustis ses meses est arribau su babbu e puru a issu l’ant agatau su triballu, an buscau sa domo in affittu, e  a furriu de  maju Tonino est ghirau a bibba e c’at  batiu su restu de sa familia e sunt istaos duos o tres annos in afitu in Solbiate, ma   tando cadaunu s’at fatu sa domo pro contu suo. Cadaunu  s’at agatau su triballu, ca  bi fiant cotonificios, tintorias, mancari chi non bi fiat mancu unu minimu de sistema de sicurezza in fabrica, bi fiant medas  immigraos dae su meridione,  si faghiant puru cursos de formatzione.

In sa Montedison, rispetu a su cotonifiu, sa situatzione fiat meda difenente, su triballu fiat prus dilicu, bi fiant sas miscelas ca fiat una frabica chimica e duncas   sos pereculos fiant prus mannos. A su tempus in Sardigna si chistionabat de sa frabica de Ottana chi fiat moende sos primos passos. Carchi sardu at fatu dimanda de trasferimentu a Ottana e li ant cuntzessu. Issu  puru istabat de la faghere, ma no l’at fatta ca si  depiat isposare. A pustis Ottana at falliu, mentres inibe no.

“Ma nois amus lotadu meda in Castellantza,”- marcat Tonino Erre –  “bi fiat meda partecipatzione a sa lota, pro sos postos de traballu,  pro sa sicuresa,  prima non fiant previstos sos permissos sindacales e a pustis los amus otennios, ca  prima fiant foras de fabricas, in su cotonificu non de teniabamus nudda, in sa Montedison inbetzes eja; antzis binas sa busta paga fiat un’atera cosa, fiat  a duas bortas in sa Montedison. E teniabamus puru su deretu a sa mensa, su diritu a sa sanidade,  ca  fimos apozados a sas menzus clinicas, teniabamus giai s’assistentzia privada, umos privilegiados.

Ma totus custos deretos los amus otennios cun sas lotas e s’azudu de pessones de valia, chi nos ant permitiu de arribare a risurtos bonos, mescamente  b’est istada  una unione de totus in custu campu pro custa sicuresa, e non solu Castellanza, ma puru  in sa zona in ue bi fiat sa Siron, sas frabicas chi produiant ismog, incuinamentu mannu,  sa nebbia, ca  imbolabat a fora licuidos gassosos, belenos de cada zenia, chene controllu perunu.

Tando peroe  cun sas lotas paris cun Luigi Mara, un ingenieri, laureu in chimica, chi at fondau Macondo, in Milano, unu centru culturale de sa sinistra alternativa de sos extraparlamentares de sinistra, e cun s’azudu puru de Mario Capanna, che semus rennessios a binchere custa gherra manna. Amus sarbau su ribu Olona, chi fiat incuinau de non credere, mancu in Inghilterra, mancu in Manchester depiat essere  gai incuinau! Bastas, cun sas lotas in Castelllanza ant obrigau s’azienda a ponnere in essida sos analizadores pro misurare s’incuinamentu e si superabant sos limites, blocabant sos machinarios, sos impiantos, ca iscarrigabant belenos cancerogenos in s’Olona. Sos analizatores, cun sos limites istabilios dae su cussizu  de fabrica, non permitiant prus de  iscarrigare belenos a su ribu.

Cun sos annos 2000  su Ribu Olona est  istau sanau grassias a custas lotas  e como colas acurtzu a custas  frabicas chimicas e mancu  ti nde acatas chi bi sunt, ca non b’est mancu s’incuinamentu acusticu, ca s’est fatu una lotta in sos annos ‘70 puru in intro sa fabrica pro faghere in modu chi esserent  silentziadu finas sos motores.

Duncas amus otenniu duos risultos: sa vittoria pro s’ambiente e pro s’acustica in custu decenniu de lotta, est istau abberu  unu decenniu entusiasmante!

E gai  como custu ribu est prenu de pische e fauna itica e si podet passizare e sa  sicuresa est garantida pro totus, non solu pro sos isportivos e sos appassionaos che a Tonino Erre chi est binas unu maratoneta e in s’intervista nos at  contau,  a parte sas lotas sindacales, puru chi tenet su rivu a duos passos dae domo  sua. E andat a currere ca faghet parte de unu sotziedade isportiva, de cursa e  dae cando ch’est in pensione, pigat parte a tantas maratonas a Roma, Venezia, Firenze, ma puru a s’estero. Cando fiat in d‘una maratona in Barcellona, pro narrere, l’est capitau unu fatu curiosu in custa tzitade. Fiant in su mese de maju e lis at nibadu, paret chi esseret dae  bintichimb’annos chi no aiat prus nibau, insumma, una bella improvvisada in sa maratona lis at fatu. Ma pro faghere sas maratonas cheret allenamentu e bisonzu de pessare puru a sa sicuresa. Pro s’agonismu cheret perparatzione,  mescamente pro sas garas e sa sicuresa, bi cheret garantzias ca bi sunt responsabilidades mannas e sos dotores isportivos sunt semper prus rigorosos in custas cosas, e  oje si pretendent bisitas prus aprofondias. 

Cando sunt arribaos in Lombardia in sos primos tempos  ant tentu domos in afitu prima, ca fiant  sette fizos. Tando ant comporau una domo manna, totu de ristruturare e duncas su tempus liberu fiat dedicau a l’aconzare sa domo  in sos annos ‘70. “A livellu sindacale si discutiat cumente passare su tempus liberu, nois non teniabamus problemas, lu passabamus ristrutturande sa domo familiare”contat Tonino Erre.

A pustis cadaunu s’at fatu sa domo personale ca s’at formau sa familia sua.

Intantu in Ollolai s’ant mantesu sa domo antica, si l’ant bene recuperada in sa Vialada, in modu chi cando ghirant tenent su logu, su torradorzu pro istare codumos.

E  partinde dae sa domo Tonino Erre at contadu sa bida sua de pitzinnu minore in ube at fatu sas iscolas elementares, chi a su tempus fiant in sas domos pribadas  prima, cando non bi fiat galu s’iscola pubblica, belle uguales a sa chi apo frecuentau ego, ca semus belle de sa matessi edade, cun sa bussa de cartone, cun su lapis, sa pinna cun su penninu de lama, cun su tinteri, sa tinta e gai totu. E at contau puru cando est partiu in postale pro andare a Portotorres pro picare sa nave e emigrare in continente e pro sa prima borta at bidu su mare a deghesett’annos e issu, naschiu in d’un’isula, sa Sardigna, at imparau a nadare in d’unu lagu, su  “Lago Maggiore”, m’at contau.

Lascia un commento

Il tuo indirizzo email non sarà pubblicato. I campi obbligatori sono contrassegnati *