“COMENTE IN DOMO, IN BIDDHA ANZENA” E “TIU FROLLANA”: DUE RACCONTINI DEL PROF. LUCIANO CARTA, BOLOTANESE

Foto di Paolo Pulina. Cagliari, 28 aprile 2018. Da sin. Bachisio Bandinu, Luciano Carta, Salvatore Cubeddu

di LUCIANO CARTA

1 – Comente in domo, in biddha anzena

Bacchisereddha fit bravu autista e in istiu li piaghiat de andhare a fora a fagher visita a carchi amigu, a carchi festa e po andhare carchi die a su mare. Operaiu in sas industrias de campu comente medas ’Oloenesos in su Settanta e s’Ottanta, si la passaiat benigheddhu e carchi die de vacanza cun sa famillia si la podiat permittere.

In sas industrias de campu diat a esser istadu s’ideale a faghere amighensias noas, ma chissai po ite, onzunu tiraiat a biddha sua e sos operaios non familizzaiant meda. Cun sas biddhas accurzu dae sempre non b’aiat meda amighensia. Teniat resone cussu sordadeddhu bittichesu de sa Primma Gherra chi, candho su cumandhante aiat nadu chi bisonzaiat de cumbattere s’inimgu austro-ungaricu e issu at rispostu chi custu nemigu non l’aiat mai né bidu né intesu, ca issu ischiat dae sempre chi “s’inimicu fint sos de Orune”, sa iddha accurzu.

Peus ancora cun sos de sas biddhas pius distantes: non si ligaiat cun sos barbaricinos, sos campidanesos fint totu iscurzos e pei lados, sos ozzastrinos fint piberittos bestidos de istrazzos, sos bosincos fint attaffiones, e coitta a sighire! Insuma, sa Sardigna fit unu continente de inimigos chenza chi neunu aeret mai declaradu una gherra. Gai est su sardu!

Mannu est istadu s’ispantu de Bacchisereddha candho at fattu un’iscoberta e candho mi l’at contada non li pariat beru a la contare. Aiat iscobertu duas biddhas de Sardigna chi faeddhaiant sa matessi limba, mancari esserent distantes una dae s’atera. E narrere chi sas biddhas de accurzu non si cumprendhent una cun s’atera siat in su tonu che in sas peraulas.

S’annu passadu Bacchisereddha po dovere est andhadu in Baronia, a Posada. Inie est intradu a unu zilleri ca teniat sidi, s’at ordinadu una birretta e s’est arrumbadu a su bancone po che la consumare. Su zillerazzu e sos ateros clientes, bidu chi fit istranzu, cun gentilesu ant cominzadu a lu faeddhare e a li dimandhare. In su chistionu l’ant dimandhadu de cale razza fidi, po agattare sa parentela. Ma Bacchisereddha, cuntentu ca l’aiant carculadu e ca los aiat cumpresos bene comente si esseret istadu in ’Oloene, lis at risostu chi non fit inie po visitare parentes ma fit de un’atera iddha.

A sa torrada, meda cuntentu po s’iscoberta chi aiat fattu, fit totu pensamentosu. Comente fit possibile chi sa limba de Posada esseret sa matessi de ’Oloene? At pensadu chi forzis in s’antighidade, po medas seculos sos abitantes de sas duas biddhas s’incontraiant comente una sola famillia, ca tra sa zente de Sardigna b’aiat paghe e faeddhaiant su matessi limbazzu. E cussu limbazzu aiat duradu finzas a-i como, in su 2018! E tandho at pensadu chi un’epoca de felizidade e paghe in Sardigna bi fit istada e chi bisonzaiat de proare a torrare a cussos tempos, mancari faghindhe in modu de faeddhare sa matessi limba, chi est comente sa meccanica chi mantenet dritta s’andhanta de su carru.

2 – Tiu Frollàna

Li naraiant “frollana” a improveru ca fit un’omine arrenneghistu e candho deppiat sinettare a calicunu li faghiat sa mossa de sa farche manna po messare fenu e naraiat: “Ti che messo sa conca a frollana!”. Pro fortuna non b’aiat mai messadu degai.

Tiu Frollana appustis de una bindhighina de annos chi fit cozuadu, est bessidu de malas cun sa muzzere, chi fit de fora. Appustis de tantu penare si podiant salvare su cozzu, una bella die si sunt lassados ca non fit pius possibile de istare che istranzos in domo. Teniant duos fizos e divididu si ant sa prore: su mannittu est toccadu a sa muzzere, su minore a tiu Frollàna.

Sa muzzere cun su fizu chi l’est toccadu si ch’est torrada a logu suo e a biddha non b’est torrada mai piusu mancu in passazu.

Pro tiu Frollàna est cominzadu su bellu de sas fainas de onzi die in domo. Tandho cucinas a gas non bi ndh’aiat e po coghere sa pasta at azzesu su fogu in sos furreddhos e at nadu a su fizzu:

“Mih?! Abbaida candho s’abba est buddhindhe e cramami”.

Tiu Frollana però non poniada linna in sos furreddhos e cuss’abba asiu ndhe teniat de ’uddhire! Su fizu che fit cascaviadu e at nadu a su babbu:

“O bà’, cust’abba non bi cheret buddhire!”.

E tiu Frollana totu arrennegadu l’at rispostu:

“Cambia s’abba, Cristos!!!”.

E bravu tiu Frollana pro s’ordine chi at dadu a su fizzu. Sas concas de beccu agattana sempre sa manera pius ladina pro isorbere sas cosas pius faziles chi ch’ogant s’ogru a su zegu.

Lascia un commento

Il tuo indirizzo email non sarà pubblicato. I campi obbligatori sono contrassegnati *