evento segnalato dall’Associazione Sarda della Catalogna
Andhira est unu progetu musicale sardu chi naschet in su 2001, cumpostu dae bator artistas: Elena Nulchis (boghe, armonium e percussiones), Egidiana Carta (boghe e flàutu) Elisa Zedda (boghe) e Luca Nulchis (pianoforte, armonium e boghe). Su grupu at collaboradu cun Dori Ghezzi, Mauro Pagani, Lella Costa, Elena Ledda, Fausto Mesolella (Avion Travel) e cumbinat in manera originale mùsica folk, world music e sonoridades mediterràneas.
In Sardigna, a “s’andhira” est una manera de cantare lìbera, chi su cuntzetu tenet raighinas in limbas antigas: “andhra” in sanscrito sìnnificat ghenna, coladòrgiu; in àrabu, Andhira inditat is isteddos impreados dae is navigantes. In su mundu de is cantadores a bolu, Andhira diat èssere s’ammentu de una tzitade fantàstica isparèssida, e is cantores suos diant èssere s’ereu subrabìvidu.
In su primu traballu discogràficu cun tìtulu “…sotto il vento e le vele”, Andhira intrat in cuntatu cun unas òperas de Fabrizio de Andrè, in chirca de unu logu sonoru imaginàriu in ue pòdere atobiare su grandu poeta.
S’ùrtimu traballu discogràficu, “Nakitirando”, publicadu semper dae Ala Bianca in su 2011, est una regorta eterogènea de cumpositziones, frutu de unu tziclu cumpositivu caraterizadu dae una relatzione fitiana cun formas diferentes de arte e de chirca, dae atòbios e collaboratziones cun artistas de apròvios culturales diferentes comente Mauro Pagani, Madya Diebate e Alberto Cabiddu pro nde arremonare unos cantos.
Andhira at retzidu su prèmiu de prestìgiu Lunezia Etno-music 2011 pro s’album Nakitirando.
