CONTOS DE ILLORAI: PREDU PANISCHEDHU


di Cristoforo Puddu

Peter Pan, cussu chi connoschent sos pisedhos de mesumundhu, at arratzadu 
 fintzas in Sardigna. Predu Panischedhu, fizu minore de una Zana de Molia e 
 de unu ricu Balente de Illorai, sónniat sempre istórias e arriscos chi li 
 permitint de intrare a betiapare cun su fradile famadu; e isetendhe cussa 
 die mànigat e drommit che unu porchedhu a papinu, ribuzendhe de crèschere. 
 Su sambenadu de Predu no est Panischedhu ma totu lu cramant gai prommore 
 chi cheret rebbotare solu cun pane modhe e cogonedhas pintadas, coment’e 
 in dies de festa.
 Sa mama, àbbile in donzi faina, azuaiat a sas cotas de su bighinadu; e unu 
 sero, a s'irmurinada, recuit dae domo de comare Majarza cun s'ingranzeu de 
 una corbuledha prena a cucurru de cogones cun berdas.
 Predu Panischedhu che apupat su sidhadu in sa mesa de coghina e piculendhe 
 lestru che unu puzonedhu in beranu iscucurrat sa corbuledha suta de oros. 
 Cun sa bentrutzedha prena suprint frades lenos, sos corróschios e sos 
 sónnios...
 Panischedhu est in su mundhu lieru chentza làcanas candho lu segudat sa 
 fada Ischíglia, amiga fidele e cumpanza de meravizosas istórias cun Peter 
 Pan. Sa fada galana, isalenada dae su viazu, suprit bolendhe dae sa bidha 
 disconnota chi no si agatat in peruna carta, pro chircare s'azudu de 
 Panischedhu a illibberare su fradile famadu chi su Capitanu Manimutzu 
 tenet presoneri. Su marineri animigotu cun s'unchinu de ferru ruinzadu 
 cheret iscobèrrere s'acóstiu de Peter Pan e de sos Pitzinnos Sonniadores 
 pro ndhe acabarrare sos bisos fantasiosos issoro.
 E Ischíglia narat: "Apo timoria chi, pro suprire a s'iscopu, potat fintzas 
 trumentare a Peter Pan!". 
 Ischíglia cómbidat a Panischedhu a li andhare ifatu, ma bidíndhelu 
 arredutosu cumprendhet chi su pisedhu illoraesu no ischit bolare, e tandho 
 cun su podere de sa majia bi lu imparat.
 E bolant lezeros che frina e lestros che fritzas in su chelu imprateadu de 
 istedhos.
 Bolant fintzas a bídere suta issoro sas abbas craras de unu mare 
 ismeraldu, chi a s'avréschida zogat lampizos de milli colores.
 Bident su naviu de su Capitanu Manimutzu, a bàrigu a bentu, cun s'àncara 
 betada a fundhu in Cala Coradhu Ruju e..., odheu!, a Peter Pan ligadu a 
 manos e a pes cun una camba russa de elighinzu. Odheu! A fatza apare cun 
 su peus nimigu sou e cun una cambarada de corsàrios a inghíriu.
 Su primu pessamentu chi carpit su coro e sa mente de sa fada Ischíglia e 
 Panischedhu est pro sos Pitzinnos Sonniadores chentza s'amparu de Peter 
 Pan, e impressidos si daent coidadu a segudare su cuadorzu, prima chi su 
 Capitanu los potat bídere e persighire.
 Panischedhu, sighindhe lestru s'atraessu de sas aeras, remuzat su de 
 fàghere. Ma ite?
 Su cuvrenu de sos Pitzinnos si agatat intro de un'élighe bedrosu, bóidu e 
 ispantosu pro sa mannària. Issos bi tessent sónnios e zogos; comente ant 
 bidu sa fada cun s'amigu nou faghent festa manna.
 Panischedhu deretu intrat in su mundhu de sos Sonniadores e bidet 
 cumpridos totu sos disizos de pitzinnedhu, coment’e in una faulabberu 
 ispantosa.
 Pro fortuna bi est sa fada Ischíglia chi, cun sa ternura de unu carosu 
 amoríbbile pítighe a sos cavanedhos, li ammentat su motivu de su bolare 
 issoro: illibberare a Peter Pan. Lassados a su siguru sos Pitzinnos 
 Sonniadores, bolant a sa patada de Roca Unturzu. Dae incue si bidiat Cala 
 Coradhu Ruju e su Capitanu Manimutzu in sa nae.
 Peter Pan ligadu, no ischindhe de sos amigos, isporadu chi caligunu li 
 potat benner in azudu, chircat cun meda afannu e peruna balia de isòrbere 
 sas funes. In su pestantu Panischedhu e Ischíglia cuncordant s'atacu a su 
 naviu, e che duas pedras de frundha s'istrampant a fèrrere su Capitanu e 
 sa chedha de corsàrios; lendhe impresse, donzi borta, cuota fintzas a Roca 
 Unturzu pro si lampare cun atza contra a sas carenas de sos nimigos.
 In sa cuntierra no s'iscàmpiat congruos, fintzas a candho su zovanedhu 
 eroe illoraesu no si ammentat sas tres peràulas arcanas chi, dies 
 ainnantis, aiat intesu e carpidu in domo de comare Majarza. Custos berbos 
 antigórios ant su podere de ammammalucare sos nimigos a tempus meda. E 
 afines, cun meda fatzilidade, suprit a ue est su famadu fradile: cun 
 mannosia isorbet sos nodos marineris chi lu tenent presoneri. 
 Torrados chentza farta peruna a s'élighe mannu, a Panischedhu, in 
 cussideru pro aer sarbadu su defendhidore de su mundhu issoro, lu retzint 
 cun totu sos unores sos Pitzinnos Sonniadores.
 Ma su bellu sónniu suprit a congruos...
 Panischedhu cun totu cussu gherrare, faghe e pista aiat irfatu su sacone 
 de terga ue si fit apasugadu. E tróula tróula che aiat corpadu sa conca a 
 sa càssia de linna de nughe, cudha cun sas tachedhaduras a mustras in 
 s'ala de dainanti e cun sos pudhos pintados, ue sa mama costoiat càriga 
 tucherada, méndhula e àteras durtzuras.
 Si suguzat totu addoliadu e cun sa famíllia a inghíriu contat de sos 
 arriscos cun Peter Pan, sa fada Ischíglia, sos Pitzinnos Sonniadores e de 
 Capitanu Manimutzu… arriscos inzendrados dae un'irbentrada de cogones cun 
 berdas!
 Dae tandho, in bidha, che at coladu paritzos annos e Predu, pro sas 
 zovanedhas, est diventadu unu noàdile ammajadore Príntzipe Biaitu; 
 mascamente como chi zirellat dae manzanu a sero cun una motedha bacanosa 
 in colore de prata, bestidu a tzacheta de pedhe e a cascu in conca. 

Lascia un commento

Il tuo indirizzo email non sarà pubblicato. I campi obbligatori sono contrassegnati *