SA DIE DE SA SARDIGNA IN TONARA SU 24 DE APRILE DE SU 2013

immagine di Tonara

di Tonino Bussu

A pustis de vàrios atopos in sas iscolas elementares e medias de s’istitutu cumprensivu de Tonara, dae parte de sos professores Tonino Bussu e Paula Mereu, sos pitzinnos de sa 1^, 2^ e 4^ elementare, cun s’azudu e s’impignu de totus sos issennantes cordinados dae sos mastros Gianni Dessì e  Rosanna Sulis, e sos piciocos de s’iscola media, su prus de sa 3 ^, cun s’impignu de sos regnantes cordinados dae sa professoressa Anna Paula Sau, ant a fàghere una rapresentatzione teatrale in limba sarda inuve s’ant a tratare medas temas ligaos a sas cundissiones de sos triballiadore sardos, de su disastru de Buggerru, de su triballu peleosu in miniera, de àteras formas de protesta chi bi sunt istadas in Sardigna partinde su prus dae sos fatos de su 28 aprile de su 1794 cando sos sardos ch’ant bulliadu a foras sos piemontesos.

E partinde dae sa crisi de oje, dae sas protestas de como, sos pitzinnos sunt torraos in secus in su tempus e ant cumpresu menzus sos motivos de sas protestas operaias, de minadores, de massajos e de pastores e sos motivos chi ant ispintu sos sardos a si rebbellare a sos piemontesos a sa fine de su ‘700.

Mèrculis 24 de aprile, in su auditorium de su teatru cumonale de Tonara sos pitzinnos e piciocos de sas elementares e de sas medias ant a presentare su frutu de sos triballos issoro cun rècitas in limba sarda chi ant a dimustrare s’impignu chi b’est istau dae parte issoro pro istudiare s’istòria de sa Sardigna, puru gràssias a s’azudu e a sa guida de mastros e professores chi de custos temas ant faveddau in classe.

Est su de tres annos chi s’Istituto Cumprensivu de Tonara istudiàt e tratat de Sa Die de sa Sardigna, gràssias a su contribbutu de sa Regione sarda chi, in base a sa leze n.44 de su 1993, at finantziau custas atividades chi permitint a sos pitzocos de connòschere menzus s’istoria de s’isula.

E cad’annu si cumprendet sèmpere de prus chi s’istòria nostra est totu de iscopèrrere, est su bonu de istudiare, sos temas trataos sunt solu una mìnima parte de s’istoria manna, longa e trabballosa de su pòpulu sardu.

E pitzinnos e mannos si rendent contu chi b’est bisonzu de l’istudiare sèmpere de prus s’istoria de su passau pro podere cumprendere menzus su presente, s’istoria nostra, s’istoria de sas viddas chi sunt ricas de eventos chi medas bortas non s’azapant in sos iscritos, in sos libbros, ma faghent parte de sa chi si mutit memòria populare ca benint contaos dae babbu in fizu e tocat a nois a los iscrìere ca si non cras no abarrat perunu arrastu de custos fatos.

S’ateru fatu de grandu importu est chi cust’istòria in Tonara, e puru in ateruve, est istada contada e istudiada in  sardu, in limba sarda.E mastros, professores e pitzinnos ant  agraidu s’istudiu e sos contos in limba, ma ant puru dimustrau de la cumprendere, de la faveddare e de lu iscrìere custa limba chi est a sa base de sa cultura issoro.

E custu est unu sinzale bonu pro s’istòria, sa cultura e sa limba nostra.

Lascia un commento

Il tuo indirizzo email non sarà pubblicato. I campi obbligatori sono contrassegnati *