CONTRIBUTO IN LIMBA PER "TOTTUS IN PARI" DI UN EMIGRATO SARDO CHE VIVE A CINISELLO BALSAMO (MI)
di Lorenzo Costantino Brandinu
I
Poi de sa manovra de s’interru
Monti li faghet su sicundu giru
su granitu li paret de papiru
vortat in oro sos focos d’iferru
pro su disocupadu e su precariu
at cumbinadu custa nova via
pro lis sanare dogni tribulia
s’istadu lis regalat su rosariu
sa laurea? paret roba superada
su postu fissu? ma ite porcheria
su degheotto? lumeru imbetzau
ca dogni trabagliante est imbisciau
chin sa bachetta faghet pulitzia
e totu custa cosa est annullada
e istadi cuntentu caru frade
lu faghet pro sa tua felicidade
II
Mentres s’isola nostra est prima in totu
però in dogni cosa est in difettu
non si realizat nisciunun progettu
e mudat s’isperantzia in avolotu
a dolu mannu de sos isolanos
serran industrias mannas e minores
si la pianghen sos imprenditores
non trabaglian in montes ne pianos
naran ch’est “in vertenza” sa Sardigna
sun sos disocupaos a disisperu
e non tzessan de los angustiare
chin sas promissas de carrasegare
chissai non los ismascheren aberu
sos imbrogliones de razza maligna
si non resessis s’isola a mendare
Monti, menzus ti c’andes a su mare.
Aggiungi ai preferiti : Permalink.