SA SARDIGNA E SOS SARDOS IN SA PINNA DE SOS BIAGIADORES CHI ANT BISITADU S’ISULA

ph: Francesco Casula

di TONINO BUSSU

Dae Cicerone a Dante, dae Pedre Gemelli a Le Lannou, dae Tito Livio a Cattaneo e a sa Riforma de Federalista de sa Costitutzione oje in Radio Nugoro Tzentrale cun s’istoricu de Ollolai Frantziscu Casula.

Oje, in sa trasmissione de limba biba, de Radio Nugoro Tzentrale, chistionamus cun Frantziscu Casula, istudiosu de istoria sarda sarda, de limba, litteratura, teatru, impignadu in sas lottas sociales e politicas pro sa chistione natzionale sarda, semper in prima linia in difesa de sa limba sarda e pro s’insegnamentu suo in sa iscolas. Cun Frantziscu, chi bibet a furriu de Casteddu, ma est originariu de Ollolai, oje arresonamus de un’opera sua  meda bella e  chi non bisonzu de no che la irmentigare chi s’intitulat ”Sos biagiadores italianos e istranieros in Sardigna.  Ma prima  Frantziscu nos at fatu  unu resocontu de su chi est capitau in Roma su 21 de frearzu passadu cando in sa biblioteca de su Senadu at presentadu s’ater’opera sua prus nodia, “Carolu Felice e sos Tirannos Sabaudos”.

Est istadas una die veramente bella pro Frantziscu cussu de Roma, carriga de emotzione, a si biere s’onore de presentare cust’opera in d’unu logu gai importante e cun relatores de grandu valia cumente a su presidente de Commissione de sa biblioteca senatoriale on. Gianni Marilotti, su dott. Antony Muroni, segretariu de su Comitadu de sa Bibblioteca e ex direttore de s’Unione Sarda, e su Prof. Giuseppe Melis Giordano, Docente Universitariu de Marketing in Casteddu . E tando che l’est belle bennida sa commotzione cando, tra medas sardos presentes amigos e parentes, sa  cantadora de Onieri Tina Cosseddu, meda brava, at intonadu s’Innu de su Patriotu Sardu contr’a sos Feudatarios in d’unu modu de incantu. Insumma est istada una die chi Frantziscu non s’at a irmenticare mai!

In s’intervista pro sa Radio semus passaos a faeddare a pustis de sos “Biagiadores italianos e istranieros”.

Ego credo chi cust’opera siat de leghere prus a fine e galu prus a fine sas operas de medas de sos autores chi sunt tzitadu, no naro de totus, ma de tzertos eja, pro cumprendere menzus chie fimus e chie semus. Medas pessant chi cando chistionamus de su tempus passadu semus faeddande de cosas betzas, de fatos chi oramai no interessant prus a nemos e duncas narant: lassade perdere, chistionae de oje. No ant cumpresu chi sos nodos chi no ant isortu eris, chi no ant istessiu eris, essint a campu oje, sos nodos istoricos chi non sunt istados craridos eris oje benint a foras totus a una borta. E tando sicumente s’istoria non faghet brincos bisonzu de crarire medas passagios de su tempus passadu pro cumprendere su chi est capitande como. Eco pruite est utile a connoschere sos iscritos de custos autores, de custos biagiadores chi Frantziscu at tzitadu in cust’opera chi ego pesso siat importante cante a sos Tirannos Sabaudos, ca si cussos biagiadores pintant sa Sardigna in d’unu certu modu sa curpa est sì in parte de sos sardos puru, ma su prus de sos guvernantes de tando, o siat de sos seculos passados, de su seculu coladu e de sos de como puru.

E mescamente faeddande de sos pessonagios famados de s’antighidade amus lumenadu a su poeta latinu Orazio, a s’istoricu Tito Livio e su pus a s’oratore e console Marco Tullio Cicerone, chi no est benniu in Sardigna, ma s’est interessadu de sa Sardigna e de sos Sardos cumente abogadu cando at depidu difendere in Roma su guvernadore de sa Sardigna Emilio Scauro accusadu de tres ‘crimini’; 1)de aere abelenadu in d’una chena a Bostare, unu tzitadinu riccu de Nora, pro si nche  impossessare de sas propriedade suas; 2)de aere insidiadu  sa muzere de unu tale Arine, chi s’est morta, bastede de non rughere in manos suas; 3)crimine contr’a s’amministatzione ca aiat pretesu tres degumas, a parte sa deguma normale, una segunda puru istraordinaria, ma su matessi legale, Scauro nd’at pretesu finas una terza totu pro issu. E custa est una accusa meda grave, pesante. E Cicerone pintat sos sardos cumente mastrucati latruncoli, ma non solu, custos sardos sunt zente chene capu, bennia a cuntatu cun sos cartaginesos e duncas est unu populu mesturadu: custu est zu zudissiu prus ratzista chi essit a campa dae s’oratore romanu prus famadu, chi bastet de binchere sa causa infamat su popula sardu pro semper!

E Emilo Scauro, guvernadore disonestu, tangentaru ante-litteram, benit assoltu, ca sos sardos in Roma Santos in Corte non d’ant mai tentu, nè eris, nè oje!

E passamus a Dante, su poeta de sa Commedia Divina,  chi pintat gai bene sa Sardigna chi medas pensant chi siat benniu, inbetzes est chi teniat amigos bonos, mancari chi non d’apat postu manch’unu in su chelu, in su Paradisu suo. E custu unu pacu nos dispiaghet. Ma su prus chi at ofesu meda Sardos est  cando Dante in s’opera “De vulgari eloquentia”,  at narau custas paragulas pro sa limba sarda: “I Sardi fra tutti i latini sembrano gli unici a non disporre di un volgare imitando la grammatica latina come le scimmie imitano gli uomini!” E inbetzes no est un’ofesa, ma unu modu pro narrere chi sa limba sarda EST DISTINTA DAE SU LATINU, EST UNA LIMBA A BANDAS DAE SU LATINU, NO EST UNA LIMBA NEO-LATINA.  E Frantziscu Casula puru l’ispiegat bene in s’intervista.

E a pustis chistionamus de Padre Gemelli, unu gesuita chi in s’opera prus nodia sua , “Il Rifiorimento della Sardegna”, est de su parrere chi sa Sardegna at a cambiare care si s’abolit su sistema agriculu comunitariu de sas terras, o siat si si comintzat a privatitzare sas terras, cumente s’est fatu in medas partes de s’Europa. Bastat a pessare a s’Inghilterra. Ma no est chi sos modellos si potant calare gai dae unu mamentu a s’ateru, in cada logu, bisonzu de tennere contu de cada realidade. E difatis amus bidu ite dannos at fatu sa leze de sa tancaduras, Legge sulle Chiudende de su 1820, chene previdire una riforma agraria, s’abolitzione de su regime feudale, e ateras cosas.

E a propositu de custos modellos calados dae artu in sos resonamentos cun Frantziscu amus apertu una discussione manna faeddande de un’omine politicu de s’Otichentos chi est Carlo Cattaneo, unu federalista cumbintu, ma chi, segunde Frantziscu teniat unu brè, unu difetu, fiat urbanocentricu, o siat a favore de sas tzitades, e non de sas biddas, de sas realidades  de sa montagna. Ma su chi importaiat, fiat sa lotta a su centralismu, a  s’istadu chi s’est manifestadu cun s’unidade de s’Italia e chi oje est galu gai inintro sa Costitutzione italiana in ue finas sa Regione nostra medas bortas benit ‘umiliada’ dae sas sententzias de sa Corte Costitutzionale chi parent nandeli : Tue non tenes podere, nen cumpetentzia in medas settores! Insumma: SEMUS PRESOS A FUNE CURTZA! E TOTU CUSTA EST S’ISPETZIALIDADE DE S’ISTATUTU NOSTRU!!! E prus cussu cando si faghet sa festa de sa Repubblica, su duos de lampadas, Frantziscu non si la sentit de festare ca custa Repubblica est frutu de unu tzentralismu chi est ora de cambiare.

In s’intervista amus tratau de ateros biagiadores cumente a s’inglesu Tennant, unu gand’omine chi proponiat a baloritzare sas risorsas locales sardas in noghe e totu, non faghende sa solita ‘politica de rapina’, ma attuande su ciclu produtivu cumpletu. Un’ateru istudiosu de balia est istadu su bretone Maurice Le Lannou, chi fiat unu geografu de grandu importu, professore a sa Sorbonne de Paris, chi a pustis chi at fatu sos istudios suos mannos supra sa Sardigna publicannde su libru nodiu “Patres et Paysans de la Sardaigne” in su 1941, at iscritu paritzos articulos in su cotidianu pariginu “Le Monde”, est divennidu unu de sos istudiosos tra sos prus connotos.                                                                                                                  

Insumma in cust’opera Frantziscu at esaminau 37 personagios tra iscrittores, poetes, archeologos, geografos, istoricos, politicos, antropologos, giornalistas, militares, deputaos, senadores chi ant girau sa Sardigna o faeddau o iscritu de s’isula nostra e duncas est unu libru chi totus bos depies leghere, ma pro como nessi ascurdadebos custu bortaedie  s’intervista chi  bos trattat in pac’ora sos temas generales in sa radio. Adiosu.

Lascia un commento

Il tuo indirizzo email non sarà pubblicato. I campi obbligatori sono contrassegnati *