S’Assòtziu de Sardos in Catalugna bos cumbida a leare parte sàbadu 1 de su mese de Santugaine a is 8 de sero a sa projetzione de su documentàriu Cagliari 1943 – Memorie di uno sfollamento, publicadu in su 2015 dae s’assòtziu Khorakhané. Khorakhané s’est impinnada fintzas dae sa fundatzione in s’ideatzione, disinnu e realizatzione de progetos cun sa punna de promòvere sa cultura de is territòrios. Su documentàriu chi nos at a presentare el presidente Giampaolo Salice, est su resurtadu de un’istùdiu subra de fontes orales e documentales, chi recostruet s’abandonu de sa capitale sarda e sa tramudàntzia de is tzitadinos fache a is sartos de is regiones internas in sa Segunda Gherra Mundiale.
Intre Ghennàrgiu e Maju de su 1943, bombardamentos graes de is anglo-americanos aiant iscutu Casteddu: is mortos sunt istados mìgias, is dannos incarculàbiles, s’efetu in sa vida de is persones dramàticu. Agiumai chentu mìgia persones aiant lassadu sa tzitade pro agatare amparu in is tretos de s’intèriu.
Su documentàriu recostruet s’istesiamentu de is casteddajos gràtzias a testimonias diretas de chie nde fiat istadu protagonista e ispetadore e cun s’agiudu de un’istùdiu istòricu e archivìsticu afungudadu. Sa pellìcula contat s’atòbiu intra de sa tzitade e su sartu, mundos chi, mancari partzidos dae sèculos de pregiudìtzios, aiant ischidos donare vida a un’esperièntzia sotziale e umana chi dae cue a in antis los aiat mudadu pro semper.
