di Anna Maria Sechi
Su pitzinnu piscende,
Si bos capitat de bennere a bisitare sa zitade de Bruxelles, tzertamente sa curiosidade bos che giughede a bidere sa Grand Place sa cale est una piata meda bella, una perla de architetura chi nde balet sa mirada. Tra una carrela a s’àtera e tra una vitrina a un’àtera ue si podent comporare sos “souvenirs”e-i sas randas tipicas de su Belgio fatas a fusu, finides pro bos agatare in sa carrela de l’Etuve, in sa cale in d’unu biccu b’est s’istatua de brunzu de Manneken-Pis (su pitzinnu piscende). Custu monumentu est in su coro de totu sos zitadinos brusselleses, est su pitzinnu prus connotu de sa capitale europea a su cale sunt atribuidas tantas letzendas in cantu a sas origine suas.
Pro nàrrere su bene mannu chi totu tenent pro isse, sotziedades, artigianos, dutores, avvocados e àteros, in omaggiu totu li regalant unu custumine chi los rapresentant in s’arte o in sa regione insoro. Custa idea est bennida a nois sardos puru. A printzipiu de sos annos otanta, deo fiat sa segretaria de sa Federatzione des sos circulos sardos de su Belgio (in cussos annos giamada Lega, su presidente fit Giagu Obinu). Pro rapresentare sa Sardigna nostra e-i sos circolos sardos de Belgio amus detzisu paris de donare a Manneken- Pis unu custumine sardu. Amus seberadu su costumine de Nùgoro considerende chi in cussos annos fit sa provintzia sarda chi contaiat su numeru prus mannu de emigrados in Belgio.
Sa zitade de Nùgoro est bistada onorada de custa initziativa nostra e at corrispostu a su cumbidu chi l’amus fatu. Pro s’occasione de s’inauguratzione de sa estimenta sarda amus retzidu una bella delegatzione nugoresa cumpresu su sindigu. Fit una bella duminiga de su mese de triulas, semus istados totus retzidos dae Monsieur Deman, su presidente de s’assotziu “ Les amis de Manneken-Pis” (sos amigos de) in su bellu salone de su palatu de l’Hôtel de Ville, un’ispantu de s’architetura gotica de su XVs in piena Grand Place, inue amus ufitzializadu su donu, presentadu in d’una solfata de argento a Monsieur Deman, intantu chi s’atendente est andadu a bestire s’istatuedda, tra unu elogiu e-i s’ateru de sos autorevoles presentes tra sos cales su poveru Ulisse Usai, nos ant servidu unu brindisi pro onorare sa bella atividade de amistade tra sardos e brussellesos. Poi totus in corteo dae s’Hôtel de Ville nos semus incaminados a sa carrela de s’Etuve pro iscobrire tra aclamatzione e tzocchidas de manos, su Manneken-Pis in sardu, cun sa berrita in conca nos est aparfidu prus bellu che mai. Sas serada s’est cumprida in cumpantzia de unu grupu folk bennidu pro s’occasione dae Sardigna chi nos at postu in movimentu cun sos ballitos insoro, isparghende allegria a totu sos turistas presentes in sa Grand Place. Cando fimis in su mezus divertire, a dolumannu nostru, iscopiat unu temporale e amus depidu lassare sa piata e chircare rifugiu in aterue.
Manneken-Pis tenet tenet unu museu ue sunt in mustra sas chentinaias de bestimentas suas e tenet unu atendente fissu pro lu bistire. Custu custumine de Nugoro faghet parte de sas colletzione, tenet su numeru 339 -Sas letzendas de Manneken-Pis sunt paritzas, custas, sunt tres de sas tantas:
Su salvadore de sa zitade:
Julianeke, (Giulianeddu) fit unu pitzinnu de sa zitade chi cun d’unu tzampillu nd’istudesit sa fiama de una micia alluta dae s’inimigu. Sos assediados pontzesint su pitzinnu in salvu e chi catzesint s’inemigu fora. Dae dando un’istatuedda nde diat commemorare cust’atu.
Su fitzu agatadu,
in su cursu de divertimentos popolares unu segnore de sa borghesia bi fit andadu acumpantzadu dae s’unicu fitzu chi teniat su pitzinnu si perdesit in mesu a sa zente, su babbu chirchende.lu in totu sas carrelas de Bruxelles, l’agatesit a poi de chimbe dies in su biccu de sa carrela de l’Etuve in sa positzione chi nos podimus imaginare. Cuntentu de sa conclusione diat aere piatzadu un’istatua de MannekePis in cussu biccu.
Su fitzu de su Duca Jean III
Jean III, teniat sese fitzos, tres mortzesint essende minores e pro tantu Godfroid at fatu faeddare de isse. A s’incumintzu de XVs Bruxelles fit istratzada dae sos partigianos de Bloemardine e adetos de Jean Ruysbroek, duos misticos. Difensores de piagheres terrenos, sos adetos de Bloemardine una die isfilesint in corteo. Bidende.los, su printzipinu, manifestesit a modu sou e-i sos partigianos de Bloemardine lu giutesint in triunfu. Custu fetesit iscandalu. Tando su Duca Jean, ofresit a su clero de faghere pesare in cussu logu un’istatuedda de pedra pro immortalare su gestu irrispetosu de su fitzu.
In su XVIIIs sas letzendas teniant pagu fentomu, sunt aparfidas in su folklore nostru dae su XIXs chi las elaborat o las isvilupat a su minimu, issas traduint sas meravitzas de custu seculu pudibundu e borghesu in deinanti ae custa tracia de su passadu.
