di GIANRAIMONDO FARINA
Custa dominiga, su bintiduos de Frearzu, sa prima de Caresima, si at tentu in Monza unu atobiu de importu mannu. Pro tottu sos sardos emigrados et fintzas pro sa tzittade brianzola, istorica terra de sa Reina Teodolinda. Et sos protagonistas de custa die sunt istados sos cantores de su Coro Logudoro de Usini. Su grupu logudoresu fit ospite, in sas dies coladas, de s’istoricu Circolu sardu “La Quercia” de Vimodrone, et at animadu galu su Carrasegare de custa bidda manna de s’area metropolitana milanesa. Comente est istadu sapadu, su bint’unu de frearzu, a daghi, paris chin sos carros locales, ant isfiladu sos mermos de sa corale sarda in costume. Chi, apusti, si sunt esibidos in sa Crésia mazore de Santu Remigiu de Vimodrone. Sa die apoi, dominiga, sa corale sarda logudoresa est istada, imbetzes, protagonista de importu mannu in sa Basilica minore de Santu Juanne Batista in Monza, pro totu su Duomo. Su grupu Logudoro at animadu duncas sa missa manna de mesudie. Missa pro sos sardos et pro totoscantos. Chi at bidu sa preséntzia de sas autoridades locales, comente s’assessora de Monza Andreina Fumagalli, delegada a sas politicas de sos zovanos et de sas pari opportunidades, et sa vitzesindìga de Brugherio Mariele Benzi. Missa chi est istada tzelebrada dae mussennore Marino Mosconni, retòre de su Duomo, chi at tentu paraulas galànas et de profundu cunsideru pro sa triballadora comunidade sarda de sa Brianza.
Sos fideles ant podidu aiscurtare sos branos de sa traditzione religiosa sarda comente Su Rosàriu, Istella mia, Babbu ‘e su Paradisu, A nostra Segnora, innu de ringratziamentu a Nostrasennòra, chèntza irmentigare su Deus ti salvet Maria, chi meda at coinvoltu sos presentes. S’afestaméntu est istadu organitzadu dae su Circolu sardu de Vimodrone, diretu dae Barbara Burghesu et vicediretu dae Marina Meloni, “sas animas” féminas de s’organismu culturale. S’ocasione fit dada dae su de trintachimbe annu de nàschida de sa Corale usinesa chi aiat disizzadu meda de festare custa afussiòne chin una missa a fora de sa Sardigna. Et cale menzus logu est istadu isseperadu de su Duomo famadu de Monza, prenu de istoria et de ispiritualidade. Pro s’ocasione est istadu fintzas cuntatadu su locale Circolu Culturale Sardu chin su presidente Salvatore Carta chi at, luego, azuadu s’initziativa, partetzipende chin medas sotzois et sotzias bestidos in costume. Et no mescamente Monza, ma a Monza sunt achipidos sos sardos emigrados de sos Circulos de Milano, Cesano Bosconde, Como et Cinisello Balsamo. Una manèra difèrente, custa, de torrare at afortire sos acapiònzos intra sos circulos. Circulos chi, in unu mamentu particulare de passazu comente custu, sunt cramados at isperimentare et pessighire prozetos novos pro una emigratzione sarda in Italia prus atenta a sos problèmas sotziales et prus protagonista.
Views: 34
Bellissimo articolo in limba sarda atto ad esaltare lo splendido evento proposto dal Circolo La Quercia Vimodrone. Complimenti all’autore Gianraimondo Farina. Una lettura molto piacevole 👏👏
Bravi grazieeee mille sono Maria l’anziana che indossava il costume ed ero tutta addobata