S’INFORMATICA COMENTE FATORE DE EGALITARISMU, DE DEMOCRATZIA, DE CAMBIAMENTOS EPOCALES E PURU ECONOMICOS E DE RISPARMIOS; NON BI ANT ESSERE PRUS TZENTROS E PREIFERIAS

ph: Luca Columbu

di TONINO BUSSU

Oje in sa trasmissione de limba biba de Radio Nugoro Tzentrale, a sas ses(h.18,00) de bortaedie, intervistamus a Luca Columbu, unu giovanu informaticu, laureadu in Fisica in s’Universidade de sa Sapientzia de Roma, ma sa bella est chi Luca triballat in New York e ego l’intervisto dae Ollolai e custos sunt sos miraculos de sa tecnologia moderna, de sa Fisica chi at a ispiegare Luca e totu, chi permitint collegamentos chi finas a eris pariant no impossibiles, ma mancu immaginabiles. E puru apo intervistau a Luca dae New York a su matessi modu cumente a ateras pessones chi apo intervistau dae Casteddu o dae Roma o dae sa Lombardia  o dae una bidda serente a nois e totu. Oramai non cambiat nudda. Prima depiabamus mutire sa pessone a sa radiu, como inbetzes, s’intervista la podes faghere puru cun su telefoneddu in caminu. S’atera die unu professionista m’at naradu:”Depo faghere una cunferentzia-istampa in Tatari ando a deghe minutos” –  “Ma cumente faghes, l’apo replicau, si semus in Nugoro como!” – “Beh, non est unu problema, mi collego cun su telefoneddu e sa chistione est risolta”-  E gai at fatu e s’est postu deretu in cuntatu cun Tatari cumente chi pariat in ibe.                                                                                        

Su matessi amus fatu su cullegamentu skype cun Luca Columbu e est cumente chi esseremus setios in d’una mesa unu in dainnantis de s’ateru prontos pro una bella chistionada, solu chi eo fio in Sardigna e issu a cudd’ala de su Riu Mannu, s’Oceanu Atlanticu mih, però!

Luca nos contat su seperu de andare a Nev York, tzitade simbulu pro eccellentzia,  chi ofrit possibilidades de triballu difenentes, de aperturas mentales mannas, cun differentzias mannas  rispetu a s’Europa, a Roma, a sas tzitade sardas e a sas zonas de mesu de sa Sardigna.

Mi soe appassionau a sa iscentzia dae minore, narat Luca, cun sas letturas e mi soe iscritu  a sa facoltade Fisica de sa Sapientzia de Roma in ue  sunt passados pessonagios mannos cumente a Marconi, Fermi e ateros.

Certu a sas primas mi soe depidu aforticare, ca sa materia fiat tosta, e finas a pustis sa laurea apo fatu chirca in Roma, ma non b’essende possibilidade in Italia de finantziamentos pro sa chirca  o s’inserimentu in su dotorau,  pro sa mancantzia de fundos, apo istudiau s’informatica pro aprofondire sa fisica e pro faghere sos esperimentos.

A pustis sa laurea che soe paradu in New York cun su Master and Back de sa Regione Sardigna  binchende una borsa de istudiu de informatica chi m’at permitiu de intrare in su sistema americanu; tando una sotziedade  m’at assuntu, cun d’unu  collega amus creadu un’applicatzione nova chi at tentu meda sucessu e bisibilidade, ca fiat  meda innovativa, prus de unu motore de ricerca,  est istada publicada in su negossiu de sa e-Pol, est istada pubblicada finas  in su The New YorkTimes.  E mancari chi a pustis est istada  tancada, però m’at permitiu non solu  una grandu bisibilidade, ma binas  de connoschere medas ditas e zente e de la ponnere in su curriculum; pru cussu apo tentu medas referentzas, – afirmat Luca – apo tentu medas ofertas de traballu e solu s’imbaratzu de su seperu. Est unu traballu istraordinariu. Invito totus a provare,  su back, a andare andat bene, ma a torrare no. Cun totus sos medios de oje sa Sardigna però podet diventare unu logu ideale pro podere triballare, bastat de connoschere bene sa limba inglesa. Bisonzu difatis de l’istudiare dae pitzinnos minores e sos zovanos depent moere a totuve e a pustis si depent ispecialitzare cun sos istrumentos informaticos.

Su grupu nostru de New York tenet ufissios in totube, non solu in sos Istados Unios, ma puru in sas Filipinas, Shanghai e in aterube pro narrere; e unu podet triballare dae totube. Non b’est prus unu tzentru e una periferia, una tzitade e una bidda,  unu logu privilegiadu rispetu a un’ateru, como unu podet seperare de triballare in Sardigna ca li piaghet s’ambiente, su mare, sa montagna, su chi preferit. 

E custa no est solu un’atera  rivolutzione digitale manna in atu, ma s’aplicatzione sua at a influire in sa mentaliade de sa zente, at essere unu fatore de democratzia, de economia, de partecipatzione, de servitzios e de medas cosas in su ziru de pacu tempus ant a tennere efetos mannos in sa mobilidade difusa chi prima mancu si podiat pessare. 

Duncas s’importantzia de custos istrumentos informaticos pro chie est in montagna, in sas zonas isoladas chi oramai isoladas non ant essere pius, duncas  at essere unu fatore de grandu importu, de egalitarismu, de democratzia, de economia e risparmiu, de informatzione e de medas ateras conseguentzias, ‘ricadute’ positivas chi s’ant a biere binas a cotiu.

Unu tempus pro s’informare, pro nde narrere una, bi fiant sas enciclopedias de paperi, e cun Luca amus discutiu puru de cussas e ascurtadebos sa radiu pro intendere ite amus naradu, como si podent consultare in sos motores de chirca in cada limba pro otennere informatziones de cada si siat tema. E bos paret nudda?

DUNCAS EST UNU CAMBIAMENTU EPOCALE!

A New York  zente dae noghe nd’andabat  binas a su cominzu de su seculu passau e partiant in nave dae Genova o dae Napoli.  Puru tziu Pera Mazzette, unu mannoi meu istimau, est istau in New York dae su 1906 circa finas a belle a sa fine de sa Prima Gherra Munduale, cando si che fiat ghirau. Isse fiat partiu in nave dae Napoli est arribau a New York, ma non l’ant lassau intrare deretu, at depiu faghere sa barantena, cumente a totus sos immigrados de tando in Ellis Island. Triballabat in una frabica de burvura e contabat chi in cussa tzitade bi fiat  unu grandu rispetu pro s’ambiente, non solu pro sas arbules, ma finas pro sos animales, sos capriolos, chervos, e gai totu; antzis pro chie no los rispetabat bi fiant multas e binas s’arrestu.  Non fiat che in Sardigna o in sa zona nostra, cando in su Rivu de Daloro si cassabat galu carchi chervu a primos de su novichentos. Difatis si contat chi s’urtimu cherbu paret chi l’apat cassau su babu de una una tzerta  tzia Mallena ‘e Chervu chi teniat unu corru propriu de chervu imboligau in d’unu pannu e lu bogabat, cando liu pediant, pro lu fricare in sa teporra de sos pitzinneddos si teniant isfogos(sanzolos o fogu de Sant’Antoni), e nai faghiat bene, contant, semper a s’antigu. Ma Corru ‘e Chervu est puru una costellatzione de s’istadiale, chi currispondet a Perseo.

E Luca cunfirmat sa traditzione antica de sos americanos in difesa de s’ambiente tantu est beru chi su primu Parcu nazionale  chi est istau istituidu est su ‘e  Yellowstone, fundau in su 1872, unu de sos ecosistemas prus mannu de sa Terra e chi est istadu dichiarau Patrimoniu de s’umanidade dae s’UNESCO in su 1978.

Ma custa sensibilidade pro s’ambiente est meda intesa mescamente in sa California in ube, pro narrere, non si podent impreare sas machinas diesel, ca est un’istadu modernu, cun una mentalidade aperta, cun medas istruturas sociales,. Epuru in Barbagia bi fiat, unu tempus, unu cuntzetu negativu de sa California. Unu frastimu naraiat: “Anco ti ch’andes in California!” Pro inditare unu logu malu. Fortzis ca che fiat avedda, allargu, meda a pustis de New York, oras e oras de trenu prus allargu

E ammentant unu tziu Micheli Culumbu chi a s’antigu fiat emigradu in California e fiat ghirau a Ollolai in bisita. Chistionabat solu su sardu e s’americanu. Depiat andare in prefetura(o sutaprefetura) a Nugoro e s’aiat pigau s’interprete ca no ischiat a faeddare s’italianu. Luca pessat chi in California a su tempus fiant andaos sos operaios e triballadores pro faghere sa ferrovia e sas conditziones issoro non fiant de sas mengius e custos cando torrabant a sas biddas issoro narabant:”Pitzinnos, mirade chi in America non de b’est canes presos a sartitza, no!”

Antzis, in America bi fiat sa cultura de su traballu seriu e fatu cun impignu e sudore. E Luca narat chi a sos immigrados de una borta, los irbarcabant in Ellis Island pro faghere sa barantena serente a s’istatua de sa Libertade e inibe los registrabant, los visitabant e, a pustis, si no istabant bene, che los torrabant in daesegus; dae custu puntu de vista fiant meda rigorosos.

Como ant apertu sos archivio chi sunt meda interessantes e deo a sos chi benint a New York, sighit Luca, lis  cussigio  semper de andare a abisitare custu museo ca est meda istrutivu, ca bastat de digitare unu numene e unu sembenadu e essit a campu totu un’istoria. Bi sunt costumenes de totu su mundu, culturas diversas, s’America est una  mistura de culturas pro cada casta binas in s’alimentatzione.

Difatis de custa si nde agatat de cada parte de su mundu e de cada zenia.

Bi sunt sos vegetarianos, sos biologicos, sos fast food de cada calidade, ma totu a livellu industriale, però, e tue podes seperare su chi cheres a pressios bassos o medios o artos, ca in America sa classe media est meda manna.

Medas ateras cosas chi Luca at narau in s’intervista, totus de grandu importu, cumente azis cumpresu, ascurtadebollas in sa Radiu custu bortaedie a sas ses(h.18,00). Adiosu.

Lascia un commento

Il tuo indirizzo email non sarà pubblicato. I campi obbligatori sono contrassegnati *