Cun sa punna de mustrare s’ammaju de sa Sardigna in intro de sa sede sua, s’Assòtziu de Sos Sardos in Catalugna ordìngiat unu cuncursu fotogràficu.
Dae s’1 fintzas a su 31 de Ghennàrgiu 2017 s’ant a pòdere imbiare fotos de sa Sardigna cun tema “Is Istajones in Sardigna”.
Regulamentu de su cuncursu:
a) Podet pigare parte a su cuncursu chie si siat, in manera lìbera e gratuita;
b) is fotografias depent èssere in colores e is cuntènnidos issoro non depent violare is leges in vigore, èssere deghile e respetare sa dinnidade de is sugetos retratados;
c) Cada cuncurrente partìtzipat cun una foto ebbia, chi est pretzisu mandare a s’indiritzu eventos@assotziusardos.cat;
d) In prus de sa foto, su messàgiu depet cuntènnere is informatziones chi sighint: nùmene e sambenadu de su partitzipante, s’istajone retratada, logu, tìtulu e descritzione curtza de sa foto. Custas informatziones ant a èssere mustradas a costadu de cada foto esposta in sa sede;
e) Pubblicatzione in sa pàgina Facebook: 1/02/2017
Acabbu de su cuncursu: 28/02/2017 a is 24:00
Issèberu de is binchidores: 4/03/2017
S’ant a pònnere a disponimentu duos prèmios:
1. Prèmiu “Diretivu”, seberadu dae su Diretivu de s’Assòtziu intra de is 20 fotos chi ant retzidu prus “m’agradat” in Facebook, chi at a èssere de 100 Euros;
2. Prèmiu “Artista”, isceradu dae una giuria de tres persones cumposta dae fotògrafos locales, chi at a èssere de 100 Euros.
S’Assòtziu si reservat su deretu de espònnere in sa sede de Bartzellona cale si siat foto retzida, semper mustrende is informatziones de su puntu (d).