WHISKY, UNU CONTU IMBENTATU DA E SU VERU


di Tommaso Esca

Itti su chimbe de Sant’Andria de su 2008, annu e mese malos a irmenticare pro sas digrasias de su tempus malu in sa vaddhe ‘e su Tzedrinu e non solu.

Sa die prima. una tempesta de abba e ventos malos ini issitos ispantosos dae intro e mare de chirru de Foche Pitzinna e de Sa Cala e su Tzecu..

Su manzanu, duos vigiles cussenziosos, dopo chi sono intratos sos pitzinnos de s’iscola primaria, ini vidende sos dannos fattos dae su tempus malu a su territoriu.

Itti unu manzanu durche e serenu pro cussu mese de atonzu , dopo s’isprammu e sos dannos de sa tempesta de ventu e abba de sa die prima.

Achirratos a sa marina de Isporoddhai a sas nove de manzanu, b’adiat unu sole caente, senza alinu e ventu e chin su mare che s’ozu e luchidu comente unu lagu de bona mutria in prenu istiu.

In sa pratha, cara a mare, solu una coppia de pessones andhalusas e nuddha de atteru.

Ini duos sennores, artos e biancos che s’arena ‘e mare e chin sos pilos in colore oro.

Acchian zestos e allegaini a boche arta in d’una limba paccu connotta..

Sos vigiles si sono accurziatos e lis ana cumpresu chi adiana pertu su cane issoro de cumpannia.

Itti unu bellu spinone in colore ‘e mele, zovaneddhu e n’de ini metta affetzionatos.

Si vidiat chi sos ospites-istranzos,pro cussu bestieddha non sentiana un’amore a pitzu petha, ma profundhu e sintzeru.

Juchiana una fotografia manna a colores e tottu sos documentos de su cane chi muttiana Whisky.

Unu paccu in sardu, in italianu, in franzesu e in inglesu, ma non in sa limba issoro su tedescu,lis ana nattu de s’ accurtziare a s’uffitziu in sa domo cumonale.

Inìe, an fattu una copia de sa fotografia e lis ana datu sos datos de Whisky.

A custu puntu, ana cumpresu chi istaini in sa tzitade de Monaco di Baviera in Germania, su maritu si nariat Harald e sa mutzere Karin.

Su calleddhu l’adiana pertu in su mese de aprile, candho son veittos in ferias a s’albergo mannu de sa marina de Isporoddhai, a si pasare, a piccare sole ‘e mare e a jochillare chin su cane issoro.

Ma de derettu, Whisky, su mascrittu, adiat intesu fraccu de carchi calleddha in calore e sit datu a sa terra mala, fughindhesi peri de sos aghasatzos de sos meres e de su loccu bellu in s’albergo a oru ‘e mare.

Sos meres ana chircatu iffattu de ortos e tzardinos, iffattu de ispiaggias de mare, rios e montes, ma de torrare a mandria a Whisky no n’de li veniat mancu a conca.

Non b’adiat manera de l’atzappare in loccu sacratu.

Issu, su calleddhu, sas ferias las itti festandhe chin piaghere a modu suo, chin sa cumpanza isulana, chin aghera e tempus vonu, in libertade e amoratzandhe.

Sas ferias de sos meres si che sono finitas e chin s’animu in pilisu, dispiaghitos, sono depitos parthire a domo issoro , senza cussa bestieddha, chi tiniana comente unu itzu vonu.

Dopo tantos meses de tristura, son torratos, chin s’isperanzia de l’atzapare vivu e sanu.

Allegandhesi tra cumpanzos de travallu, sos vigiles, s’adiana ammentatu chi a fine maju adiana atzappatu andhalusu e ricoveratu a su canile pubblicu de su circondariu, unu calleddhu chi si assemitzait a Whisky.

Prima de su ricoveru, l’adiana attu carchi fotografia, comente acchen sempere chi sas poveras bestieddhas andhalusas e abbandonatas chi atzappana in su territoriu issoro..

Candho sono andhatos a su canile, a sos turistas istranzos lis an data sicurantzia chi su cane issoro l’adiana tentu in custodia inie.

Ma dopo carchi mese, una sennora tedesca chi bivet a Orosei , si l’adiat piccatu in adotzione.

Itti troppu bellu e ispipillu pro lu lassare in cussu ricoveru, a si intristire de solitudine , chin paccu proendha e in mancantzia de agasatzos.

Chircàta e atzapàta sa mere nova de adotzione, chin grandhe allegria e cuntentesa pro tottus, Whisky este torratu chin sos meres vetzos.

Issu puru itti a iscuitzattas, baulandhe,brincandhe a supra issoro, cuntentu e alligru che pasca.

Candho sono andhatos a ringratziare sos vigiles pro sa valentesa, tandho e solu tandho, Harald si este presentatu comente unu de sos capos de sa Politzia de Monaco di Baviera e sa mutzere non si n’de potiat ispomporoddhare de sa cuntentesa, dopo meses d’ anneu e tristura.

Custa vorta sos amicos tedescos ana appretzatu su travallu seriu de sos collegas sardos-italianos.

In cussa occasione, amicos de sos vigiles, los ana piccatos chin issos, a unu zardinu de aranzos de su passiale ,chi sa die prima, sa tempesta de abba e ventu adiat degollatu.

In terra b’adiat quintales e quintales de aranzu e atteros agrumes.

Sos turistas tedescos, maritu e mutzere ini a bucca aperta de s’ispantu e de su dannu.

Sos amicos:<< Harald, golli tottu su chi cheres pro domo tua, oje non si paccat, este unu regalu: Candho capitana custas digrassias,inoche, si preferit a la regalare sa fruttora e no a la lassare perdhere in terra>>.

Non si sono attos precare sos istranzos, gullindhe aranzu bragheri, limone e mandharinu a una vittura, mancari ischiana chi deviana torrare a domo issoro chin s’aereo.

Candho sono arribatos a s’aereoportu, Harald e sa mutzere, mancari bi adiat calore si sono impottitos de vistire a tantas pitzas, chin gappotto e pelliccia.

Sas valligias e sas borsas las ana prenatas de cussos agrumes de sos amicos novos de Sardinna.

Cussu regalu mancari de paccu valore e s’atzutu pro atzappare Whisky los adiat cummossos.

Dopo custa resissita, sos amicos tedescos torrana de tantos annos a su mantessi albergo a si pasare.

Issos puru non torrana a manos iscutas, juchedhe carchia assatzu de cussas birras vonas chi si assazana a s’Oktoberfest de Monaco di Baviera, inuve onzi annu bi attoppat zovanos e mannos de onzi parte ‘e mundhu.

Sono oramai comente amicos vonos de pasata.

Pasandhe e piccandhe sole ‘e mare, lis aggradat de colare una serata paris, in allegria, mandhicandhe carchi vucone de delitzias sardas e arreionandhe a sant’arranza e a sa porcheddhina de novas, imparadhe carchi paraula nova tottus, de tedescu, de italianu e de sardu.

Aggiungi ai preferiti : Permalink.

Un commento

  1. A Massiliano e famiglia e a tottu sos sardos chi pro istudiu , amore o bisonzu de travallu biven in fora de Sardinna unu disizzu :
    ” A NOS ATZUARE E CHERRER VENE A PARE A PARE ONZI DIE, CUSTU ESTE UNU BONU NATALE CHI BOS AUGURO PRO TOTTU S’ANNU NOVU 2017″. Tommasu Esca

Rispondi a Tommaso Esca Annulla risposta

Il tuo indirizzo email non sarà pubblicato. I campi obbligatori sono contrassegnati *