SARDEGNA PROTAGONISTA A BUENOS AIRES: IL GRUPPO FOLK DEL CIRCOLO SARDO DI ROSARIO HA BALLATO DAVANTI ALLA CASA ROSADA


di Salvatore Taras

Sa Sardigna est istada protagonista manna, domìniga, in sa capitale de s’Argentina, pro sa festa “Buenos Àires Cèlebra Itàlia”. Totu sa carrera “Avenida de Mayo” fiat interessada dae istands de produtos italianos, cun sas banderas de su tricolore a costàgiu de cudda argentina. Non podiat mancare sa bandera de sos bator moros, bene piatzada in sa postatzione ammaniada dae sos emigrados sardos.  Sunt istados meda sos màndigos chi sunt istados fatos a connòschere e a assazare a totu: dae sos pabassinos a sas casadinas, dae sas seadas a su gatò cun mele, ma finas suspiros e licores de murta, petzi pro nde numenare calicunu. A retzire sos istràngios bi fiant sa presidente de su Tzìrculu sardu de Buenos Àires, Ànghela Solinas, originària de Macumere, umpare a Margarida Tavera, vitze presidente de su tzìrculu e fìgia de unu emigradu de Ìtiri Cannedu.  In un’àteru gazebo a costàgiu, sa gente at pòtidu ammirare sas siendas de su mègius artigianadu sardu: sos tapetos, sas pupias in costùmene, sas caratzas, sas campanas e sos bellos costùmenes de sas fèminas. Su grupu folclorìsticu de Rosàrio at allegradu sa gente ballende su ballu tundu in subra de su palcu, in sa famada “Plaza de mayo”, a cara de sa domo presidentziale: sa “Casa Rosada”. Carchi làgrima no est mancada dae sos ogros de sos presentes. Sos bellos passos de sos dantzadores sunt istados aggradessidos e aplaudidos meda dae su pùblicu. In màssima, at fatu ispantu sa resessida de tziu Mureddu de Orane, 94 annos subra de palas, 64 de custos passados dae emigradu in Argentina, e rèdutze de sa gherra de Rùssia. Unu risu tristu su sou, cun sa nostalgia pro sa terra nadia lassada pro nch’andare in s’àtera ala de su mundu in chirca de traballu, ma galu, cun sa gana de ballare in costùmene, e de fàghere a connòschere sas traditziones bellas de Sardigna in totu su mundu. Est forte a beru su sentidu de sos argentinos pro sa Sardigna. Non pètzi ca b’at una comunidade manna de emigrados chi benint dae s’ìsula, ma finas ca sa capitale est istada fundada e batijada in su 1535 in onore de sa Madonna de Bonària, sa de Casteddu, protetora de sos navigantes e patrona màssima de Sardigna. 

Lascia un commento

Il tuo indirizzo email non sarà pubblicato. I campi obbligatori sono contrassegnati *