SOS FIORES DE TIA NINETA


di Anna Maria Sechi

Tantos annos faghet in bidda, su mese de maju fit giamadu su mese pius bellu de s’annu. Sas dies mannas e solianas intzitaiant sa tzente a faghere sas bellas iscampagnadas. In su mese de maju,  sa lughe de s’amadu  sole chi cuminzaiat a iscaldire sa terra e-i sas palas des sos massaios chi tribagliaiant in sas campagnas, pariat pius bia. Onzi cosa pariat diversa, pius allegra e colorida chi faghiat prus bella sa vida. Pariant pius bellos puru sos muros de pedra chi serraiant sas cortes de sas domos. Tra una pedra e-i s’atera s’idiat carchi tziligherta frimma isetende chissà ite. In zeltos tratos de muru, bi creschiant piantinas arestes chentza lumine chi daiant fiores a tapeto gasi pro cherrer bestire carchi prammu de cussa pedra nuda e rutza.
Maju est su mese de sos fiores. In bidda bi fit tia Nineta, chi pro sos fiores bi perdiat su sennu de sa conca, tot’in tundu a sa domo sua b’aiat una corte manna serrada a muru, contr’a su cale a part ‘e intro, a longu a longu, largos istrisciones de terra fint piantados a fiores de ontzi 
tipu : rosas, litzos, gravellos e ateros fiores de maju chi fit una bellesa a bidere. Tia Nineta, sa coltzita, si retziat male in pês suos, fit unu pagu rassita e iscarrucada. Fidi una femina de bona familia, meda devota a Nostra Signora de su Rosariu, ontz’annu, in su mese de maju su piaghere sou fit de fiorire s’altare de cheja, in onore de su mese marianu.
Pro podere mantennere sa prommissa sua, bi teniat una pitzinna chi li serviat de  batidora de  abba. Fimis in sos annos 50’,  in cussos annos nisciunu bi teniat s’abba in domo. Sa tzente andaiat a leare s’abba a sas funtanas publicas chi fint piatzadas un’ atesu dae s’atera pro su bisogno de sa populatzione, tia Nineta, addolorida comente fit semper, pagu si podiat movere. A sos fiores serviat s’abba manzanu e sera, pro los podere abbare, in cambio de carchi petzita de casu, custa pitzinna onzi santa die a manzanu e sera,  andaiat e torraiat  deghinas e deghinas  de ortas a funtana pro li atire s’abba netzessaria. 
Sa funtana pius acculzu fit unu pagu a in foras de sa bidda, cando s’andaiat a funtana, toccaiat de isetare su turnu sou pro podet pienare s’istergiu de s’abba,  broccas o padeddas. Sa pitzinna, non si impressaiat, fit pitzinna meda e si leaiat su tempus de giogare cun sas cumpagnas ch’intopaiat in sa funtana. Cando sind’ammentaiat poniat sas duas broccas a pienare e poi una brocca in manu e una apogiad’in chintu s’incaminaiat a se tia Nineta. Sa tzente chi la idiant in su caminu li naraiant:  – A ti moves pitzinna, tia Nineta t’est isetende, ohi, già ti los est lampende duos frastimos chi dannant s’anima puru a su diaulu. – Tia Nineta, bon’anima, teniat bonu coro e fit femina de cheja, ma fit puru sa pius frastimaiola de sa idda, totus l’ischiant, ma pero’ ogni mese de maju fit issa chi, a cheja jughiat sos pius bellos fiores cun tota sa devotzione sua.

Lascia un commento

Il tuo indirizzo email non sarà pubblicato. I campi obbligatori sono contrassegnati *