IN TONARA SU COMUNE FESTAT SA DIE


di Tonino Bussu

S’amministratzione cumonale de Tonara at cherfiu festare sa die pur’ocannu e pro ammentare sos fattos de su 28 de aprile de su 1794 at seperadu de faveddare puru de unu de sos fizos suos famaos,: s’avogadu Vissente Cabras, pessone de importu de su ‘700, nàschidu in Tonara e andadu a istare a Casteddu dae picciocu cun sa familia sua.

Vissente Cabras est istadu arrestadu propriu su 28 de aprile de su 1794 paris cun Luisi Pintor e propriu a causa de custos duos arrestos, Efisiu Pintor, frade de Luisi, at ziradu sas vias de Stampace incorazande sa zente a si moere pro illiberare sos presoneris.

In cussu mamentu es naschìa sa revorta contr’a sos piemontesos ca su populu s’est bortadu contr’a custa ingiustizia arribande a su Casteddu e a sa presone inube fin istados ingaleraos Cabras e Pintor, illiberandechelos e arrestande su vicerè e totu sos ateros piemontesos chi an azapadu inive.

Cust’est istadu su comintzu de sa chi an mutidu s’emotzione o sa die de s’acciappa.

E s’amministratzione comunale de Tonara, grassias puru a un’aggiudu de s’assessoradu regionale a sa pubblica istruzione, in base a sa leze 44 de su 1993, oje ammentat custos e ateros fattos de sa vida de Vissente Cabras, ma puru de sos personaggios de importu prus mannu chi an fattu s’istoria de sa Sardigna de sa fine de su ‘700, trattande puru de ateros omines famaos chi an sighiu a gherrare pro mezorare sa situassione politica, economica e sociale de sa Sardigna in s’Ottichentos e in su Novichentos.

Si partit duncas in Tonara dae Vissente Cabras pro faveddare puru de Giomaria Angioy, ma finas de Asproni o Gramsci o Lussu, pro nde lumenare pacos, chi in s’800 e su ‘900 an sighiu in su surcu de chie cheriat una Sardigna prus libera e autonoma prima dae su Piemonte e tando dae su Regnu de Italia e a pustis finas in s’era repubblicana.

De totus custos fattos an  a chistionare oje Tonino Bussu e Paula Mereu in su teatru cumonale de Tonara a sas ses e mesu de bortaedie a pustis sos saludos de su sindicu Predu Paule Sau e de s’assessore a sa cultura Ganni Dessì siat pro ammentare sa Die de sa Sardigna e siat pro onorare unu fizu de Tonara, chi teniat fama manna in Casteddu in sa segunda parte de su ‘700 non solu comente avogadu, ma puru comente omine de fiducia de su re de Sardigna.

Lascia un commento

Il tuo indirizzo email non sarà pubblicato. I campi obbligatori sono contrassegnati *