IL 24 APRILE, SA DIE DE SA SARDIGNA AD OTTANA


di Tonino Bussu

Sa Die de sa Sardigna in Ottana

Martis 24 de aprile, in Ottana, pro sa festa de su populu sardu, sa die de sa Sardigna, a sas chimbe e mesa de bortaedie, in su centru polivalente Emiliu Lussu, s’at a fagher un’attobiu pro faveddare de s’istoria sarda partinde dae sos motos antifeudales e arribande a sa casione de sas tancas serradas a muru e a su connottu.

A pustis de sos saludos de sos amministradores cumonales an a relatare Paula Mereu, Tonino Bussu e Teresina Serra chi an a trattare sos temas de istoria a fine a fine.

Tra una relata e s’atera b’an a essere sos cantigos de sos Talinos chi an a presentare medas cantones tra sas cales s’innu de Frantziscu Innassi Mannu “Barones sa Tirannia, procurade ‘e moderare”, Entula, che a sos bascos e che a sos irlandesos,O Sardigna custa est s’ora, Terra anzena, Paghe e gherra.

Cust’atobiu si faghet puru grassias a unu contributu de sa Regione Sarda, assessoradu a sa pubblica istrutzione, in base a sa leze 44 de su 1993 chi at istituidu Sa Die de sa Sardigna.

Cun custa festa s’amministrazione cumonale, cun s’azudu de sa Regione, cheret fagher connoscher mamentos de s’istorias sarda chi an tentu unu grandu importu in su fine de su ‘700 e in s’800 cando sos sardos fini in d-una situassione politica meda grave, si pessamus chi a su tempus de sa rivoluzione francesa in Sardigna bi fit su feudalesimu chi fit assimitzante, si non peius, de s’ancieme regime de sa Franza.

E custu sistema feudale bloccabat s’irviluppu de s’economia sarda e limitabat sa libertade de sos sardos chi subian abusos troppu mannos e pesantes.

Pru cussu su populu de medas viddas s’est bortadu contr’a custu sistema gherrande contr’a sos feudatarios, cun manifestatziones e protestas in medas comunes tantu est beru chi su vicerè, pro appachiare sos animos de sos popolanos, lis at mandadu , a Sassari, su zuze de sa Reale Udientzia Juvanne Maria Angioy comente Alternos, chi cheret narrer cun sos matessi poderes de su vicerè e totu.

E duncas s’at a trattare de sa missione de Angioy e de sa ribellione de su populu chi at a causare pro s’Alternos s’esiliu in Franza.

Ma un’ateru  tema de trattare in custa die est sa chistione de sa terra, comintzande dae s’idea chi solu criande sa propriedade privada sa Sardigna podiat mezorare.

Cumbintu de custu su re in su 1820 at fattu sa famada leze de sas tancas serradas, le chiudende, chi an criadu medas malumores tra pastores, massaios, proprietarios de sos cunzados serrados, mentres non b’est istadu peruna mezoria, perunu progressu, anzis suni aumentados sos fattos delincuentziales, sos abusos, sos bandidos e sos murrunzos.

E lu pintat unu  poeta in d-una cuartina famada su clima de arraffa araffa: Tacas serradas a muru, fattas a s’afferra afferra, si su chelu fit in terra, serraizis cussu puru.

E custa situassione s’est galu ingraviada cun s’atera leze chi at privatitzadu sos terrinos de godimentu pubblicu, sos  terrinos adempriviles.

Cust’ateru provvedimentu at causadu su matessi malumores mannos ca in medas viddas si suni vortados contr’a sa privatitzazione de custos terrinos e an protestadu meda.

In Nugoro in particolare an occupadu su comune e an brusiadu sos incartamentos de sa lottitzatzione de Pradu abochinande “A su Connottu, cherimus torrare a su connottu, lassades sas cosas comente las amus connottas”.

Ecco pruite sa Die in Ottana at a essere de importu e de interessu e duncas si cumbidan mannos e minores a andare a s’attobiu de sas 5  e mesu.

 

Lascia un commento

Il tuo indirizzo email non sarà pubblicato. I campi obbligatori sono contrassegnati *