SAPADU SI CHISTIONAT DE ANGIOY, ASPRONE E GRAMSCI IN MAMUJADA PRO SA DIE DE SA SARDIGNA

veduta di Mamoiada

di Tonino Bussu

Sapadu 14 de aprile, a sas 5 e mesu de bortaedie, in Mamujada si chistionat de tres omines de valia de s’istoria de sa Sardigna: Giomaria Angioy, Giorgio Asproni e Antoni Gramsci.

De custos personaggios mannos, chi galu oje suni un’esempiu  de impignu politicu e de resonamentos profundos, si nd-at a chistionare pro festare sa Die de sa Sardigna grassias a s’impignu de s’amministratzione cumonale de Mamujada e de un’azudu de s’Assessoradu Regionale a sa Pubblica Istruzione chi, in base a sa leze 44 de su 1993, cheret incorazare sos istudios de s’istoria de sa Sardigna comintzande dae sos fattos capitados a sa fine de su ‘700 cun su 28 de aprile cando sos casteddarjos ch’an bulliadu a foras sos piemontesos, vicerè cumpresu.

A pustis sos saludos de sas autoridades cumonales, su sindicu de Mamujada Graziano Deiana e s’assessore cumonale a sa cultura Agostinu Melis, sos relatore Paula Mereu, Tonino Bussu e Teresina Serra,  an a fagher sas relatas issoro in limba sarda faveddande de sas friguras distintas e bonas  de Giomaria Angioy, Giorgio Asprone e Antoni Gramsci.

Chi cras bortaedie sos temas sian de grandu importu si podet cumprender zai dae su fattu chi si trattat de faeddare de pessone e de periodos istoricos chi incurfin tres seculos, su Settichentos, s’Ottichentos e su Novichentos, sos seculos in sos cales an operadu Angioy, Asprone e Gramsci.

Seculos in sos cales suni capitados fattos de grandu importu comente a sa rivoluzione francesa, su risorgimentu italianu, sa prima gherra munduale e su fascismu, fattos in sos calos si suni inseridas sa vida e sas atziones de sos omines de valia sardos de sos cales s’at a trattare a fine  a fine su ruolu chi an tentu in custos eventos mannos.

A sa base de totu b’est sa naschida de sas raighinas autonomistacas, sa naschida de sa chistione sarda, su ruolu de sos intellettuales in s’irviluppu de un’Istadu e in su progessu de sas conditziones sociales e economicas de sas popolatziones.

Cadaunu in su tempus suo custos tres omines mannos de sa Sardigna, custos tres gigantes de s’istoria nostra, an fattu sa parte issoro ponende a servissiu de sa zente, de su populu sardu sas ideas e sas forzas issoro pro tender a criare una vera e propria rinaschida de sa Sardigna.

Duncas sos temas chi in Mamujada s’an a trattare an a essere mannos e bonos, de grandu interessu  e de attualidade mancari chi si faveddet de su Settichentos, de s’Ottichentos e de su Novichentos.

Certos argumentos paren discutios custas dies, in su ‘e tres Millennios, sinzale chi in s’istoria sas peleas e sas gherras pro mezorare s’umanidade sun belle semper sas matessi.

Tra una relata e s’atera, sa cunferentzia at a esere alligritada dae sos canticos de sos tenores mamujadinos, ‘Su cussertu mamujadinu’ e  ‘Santu Gosomo e Damianu’ chi an a presentare sos canticos bellos e galanos de su repertoriu issoro.

Lascia un commento

Il tuo indirizzo email non sarà pubblicato. I campi obbligatori sono contrassegnati *