MOTZIONE PRO S'INDIPENDENTZIA E COSTITUENTE (CONTRIBUTO IN LIMBA)


di Tonino Bussu
 
Su cossizu regionale botat nono a s’indipendentzia
S’est discutiu de sas reformas e como s’arribat a su resurtu; a sa fine  si discutit de duos temas: 1)chie est chi depet perparare s’istatuto novu de imbiare a su parlamentu; 2)sa votassione de sa motzione sardista  pro s’indipendentzia.
De cust’urtimu tema si nd-est faveddau meda in cossizu regionale e in s’istampa e in attovios finas in foras de Sardigna, comente at fattu s’associatzione de sos sardos de Verona.
In cossizu regionale però si depet dezider, si depet legiferare.
E s’atera die s’est discutiu de custu tema e sos sardistas ischian de esseren belle solos, ca sos ateros partidos an faveddau de totu,  de su chi non funtzionabat in cossizu, de s’autonomia superada, de s’istatuto chi no est istau applicau de su totu, de sa necessidade de tenner medas e medas prus poderes, de sa soverania de sa Sardigna.
S’est faveddau de s’impignare a arribare a un’istatuto prus liberu, chi esseret tentu totus sos poderes possibiles, inintro sa costituzione e totu custu faeddare pariat chi esseret cherfiu narrer cun craresa chi sos sardos depen tenner s’indipendentzia.
Inbetzes nono, totu bisonzat de dimandare, francu s’indipendentzia chi paret una paragula chi fachet timer.
E difatis cando s’est passau a sas votassiones su resurtu s’est bidu: de ottanta cossizeris regionales, mentres s’arresonabat de unu tema de importu goi mannu, 39  fin assentes, tenian ateras cosas de irbrigare, de fagher( diat esser bene a ischire chie fini custos assentes, mah…..), e de sos presentes deghe an botau a favore( chimbe sos sardistas, unu de s’udc Roberto Capelli, tres de su pdl Felicetto Contu, Sisinnio Piras e Antoneddu Peru, unu de sos riformadores Attilio Dedoni.
Mentre si suni astennios 6 de sos riformadores, chimbe de su pdl, Oppi de s’udc e Cuccu de su Pd.
An botau contra inbetzes 16 cossizeris de su PD e de SEL e 12 de su Pdl.
Unu resurtu bonu est chi sos indpendentistas in cossizu regionale suni deghe, su doppiu, a duas vortas sos cossizeris sardistas presentes.
B’est de cussiderare chi finas sos astennios suni serente a sa posizione sardista, ma no an tentu su corazu de s’ischierare.
S’ateru datu de importu est chi in sos partidos de sa giunta regionale bi suni indipendentistas cumbintos, in su pdl, in s’udc, in sos riformadores, no alleghemus de sos sardistas.
Mentes in su centrosinistra s’unicu chi s’est distintu est su cossizeri Cuccu chi at fattu un’ifortzu mannu a s’astennere.
Su fatu chi maraizat de prus est su votu cuntrariu de sa cossizera de sos ruviosmoros: menzus no namus nudda cha si nono noch’essit carchi allega mala. Ch’est acabau su ite narrer!
Casta de credibilidade chi at a tenner dae como in susu cando dimandat prus poderes a sa Regione e marcat sa necessidade de esseremus autonomos dae Roma!
Como si trattat de bier sa fortza e sa cumbintzione chi sos chi an botau a favore tenen inintro sos partidos issoro pro facher in modu chi sos astennios e sos contrarios  diventen a favore unu cras.
Pro su partidu sardu e pro s’ideale indipendentista, ischinde dae ube semus partios, ischinde cal’est sa situassione e sa geografia politica de su cossizu regionale, est un vittoria manna, pro sa Sardigna est unu catzottu chi lassat su sinzale in sa cara.
Mentres sos sardistas proponian libertade e soverania, sos ateros no an tentu su corazu de si che illiberare dae sa servidude.
Pessan difatis  chi sa sorte de sos sardos siat de  esseren teracos  e non meres in dom’issoro!
Dae oje però si depen aperrer arresonos, si depen facher atovios pro sichire a faveddare de su tema de sa libertade, de s’indpendentzia, siat in Sardigna e siat in foras de s’isula in modu de tenner apozos e cunsensos puru in aterube.
 
Passat sa costituente pro iscrier s‘istatuto
Seperu de importu mannu s’atera die in cossizu regionale cando est passada belle a s’unanimidade sa proposta de facher iscrier s’istatuto da un’assemblea eletta dae su populu.
Fit sa linea de su partidu sardu, de sos riformadores e de s’udc e a sa fine finas de su pd.
Sos cossieris regionales de sos ateros partidos puru si sun cubintos chi non bastavat a delegare a sa commissione riformas s’impignu de iscirer s’istatuto novu.
Certu no est propriu s’assemblea costituente, ca a sa fine su risurtu de cust’organismu elettu dae su populu ,depet esser torra discutiu e approvau dae su cossizu regionale chi l’inbiat in parlamentu.
E sa dezisione finale at a esser sa de su parlamentu talianu chi approvat o negat  su chi sos sardos pretenden e dimandan.
Como sa commissione autonomia tenet 90 dies de tempus pro ammaniare sos seperos politicos e tecnicos  e sos modos pro elegher cust’assemblea.
Totus sas forza politicas sun de acordu cun custu seperu, su presidente Cappellacci at dichiarau  chi est cominztzada un istagione de cambiamentu, sa presidente Claudia Lombrdo at marcau s’importu mannu de s’ispiritu unitariu chi puntat a facher de custa legislatura una legislatura costituente. Mario Floris narat chi custu seperu dat balore a su Cossizu  e a sa  commissione, ma ponende in mesu puru sas fortzas de sa sotziedade sarda pro si poder confrontare cun s’Istadu.
Micheli Cossa, coordinadore de sos riformadores e vicepresidente de su cossizu regionale  est cuntentu ca est passada  sa linea chi issos inditan dae su 2001.
Grandu alligros Silvio Lai e Mario Bruno de su pd ca sun cumbintos chi siat passada sa linea issoro chi inditabat a torrare a iscrier su cunzettu de autonomia.
Puru Mario Medde accollit cun piachere sa decisione pro sa costituente.

Lascia un commento

Il tuo indirizzo email non sarà pubblicato. I campi obbligatori sono contrassegnati *