di Angelino Tedde e Paolo Pulina (nella foto Angelino Tedde)
Angelino Tedde a Paolo Pulina
Paulu caru, de Pavia tzitadinu
cun sos paesanos tuos non ti la lees
ca cultura nde faghen meda ighinu
an prubbicadu tantu chi no rees
a los leggere totu in doigh’annos.
e an puru sotios meda in cussa idda
de cultura de limba chen’ affannos
e de geniu abbundat s’istinchidda
No faeddemus de Giuanne Ipanu
de Antonicu Iddau grande dutore
de sa pinacoteca, a cras manzanu,
de s’archiviu e de su grande retore.
No ti faeddo de sas tesis de laurea
ch’an coronadu meda giovaneddas
in s’universitade nostra pius antiga
A Tzaramonte ponent meda baula
e ischini sonare sas padeddas
Piaghe de cultura gia est amiga.
II
Faeddas poi de soddos e sodditos
ch’ in terra anzena nos faghen onore
colpos s’iscudent chei sos poveritos
cando si pesan altos chei s’astore.
Sa cosas mannas cherene modestia
in custu mundu pienu de ogni male
torren cuntentos a giogare a imbrestia
chena ponnere in ojos meda sale.
Tando su coro de Tzaramonte nostru
ad a torrare bellu e amantiosu
comente sa natura l’at pintadu
Andemus a pregare Babbu Nostru
ch’at lassadu su Chelu e meda gosu
pro salvare su mundu dae pecadu.
Anghelu de sa Niera
Ed ecco la replica:
Paolo Pulina ad Angelino Tedde
Anzelinu caru, si cheria una proa
de su cane chi si mossigat sa coa
l’apo apida cun s’arrejonamentu tou.
Piaghe at seguru su Pantheon sou
ma inoghe no si faeddat de istoria
ne si discutet de sos omines de gloria;
est seguru chi incue Piaghe resistit
ma in su web Piaghe oe non esistit.
Tantu est beru: non sunt sos piaghesos
chi riponnent ma de sos tzaramontesos
unu chi at unu blog ativu e totu sou
ca Anzelinu Tedde est su nòmene tou.
Anghelu, sas cosas de Tzaramonte tue las rees
ma ti naro "cun paesanos tuos non ti la lees".
In dogni modu su chi non si potet negare est custu:
tzaramontesos in web bi sezis e bi leades gustu.
Paolo Pulina
